Vizitka – ilk baxışdan kiçik və sadə dizayn işi. Amma bu 5-10 sm-lik kağız parçasına kreativ (yaradıcı) yanaşarkən ortaya tamam fərqli, heyranedici və yaddaqalan bir iş çıxartmaq olar. Vizitka dizaynı haqqında əvvəlki dərslərdə söz açmışdıq. Bu dəfə isə qısa olaraq kreativ vizitka dizaynına nəzər salaq.

Bunun üçün, işə bir neçə istiqamətdən yanaşmaq olar:

Ölçü və forma

Standart ölçü və formalı vizitkalar bir sıra üstünlüklərə malikdir: materialı və çapı ucuz başa gəlir, vizitka qablarına rahat yerləşir, cibdə gəzdirmək çətinlik törətmir və s. Amma bir qayda olaraq belə vizitkalar digərlərindən heç nə ilə fərqlənmir. Seçilmək üçün ilk vasitə vizitkanın ölçüsünün normadan ya böyük, ya da əksinə, çox kiçik etməkdir. Vizitkanın formasını da fərqli seçə bilərsiniz. Məsələn, düzbucaqlı əvəzinə kiməsə kvadrat vizitka təqdim etsəniz artıq yaradıcı bir iş görmüş olarsınız. Bir az çox xərcə düşüb dairəvi, küncləri ellips formasında olan və ya tam xüsusi kəsimli vizitka hazırlamaqla daha kreativ iş görmək mümkündür.

Material və effektlər

Standart vizitkanı adi qalın kağızda deyil, bahalı dizayner kağızlarında hazırlamaq kartınızı fərqləndirəcək. Belə kağızlar rəngi, parlaqlığı, səthinin nahamar və çıxıntılı olması ilə adi kağızdan çox fərqlənir. Bizdə çox dəbdə olmasa da vizitkanı daha fərqli materialda çap etdirmək də mümkündür. Məsələn şüşə, plastika, taxta, metal və s. materaillar kreativ vizitka üçün yararlı ola bilər.

Çap metodu

Adi halda vizitka rəqəmsal çap maşınlarında, tirajı çox olduqda isə ofset çap üsulu ilə mətbəədə çap olunur. Bu metodlar tiraj çox olduqda ən optimal variantdır, lakin orijinal deyil. Basma, qabartma, ipəklə çəkmə vasitəsilə və bahalı boyalardan istifadə etməklə fərqli görünüşlü vizitkalar hazırlamaq mümkündür.

Rəng və stil

Bütün yuxarıda sadalananlar asanlıqla vizitkanı kreativ edə bilər. Amma bu heç də o demək deyil ki, adi vizitkanı kreativ tərtibatda hazırlamaq olmaz. Güclü dizayner ideyası, tamam fərqli stil və orijinal rəng (rənglər) seçimi də kreativ vizitka üçün əsas ola bilər.

İnformasiya

Ümumiyyətlə, biz sadəliyə üstünlük verməyən millətik. 99% hallarda vizitkalarımız az qala məlumat kataloquna oxşayır )). Amma onu deyim ki, bu işi tam tərsinə görməklə çox asan metodla kreativlik etmək mümkündür. Vizitkanı ağ fonda hazırlayın, ortada sadə şriftlə adınızı və vəzifənizi, aşağı hissədə də əlaqə nömrənizi yazın. Bu da olsun kreativ vizitka. Bəlkə dediyim metod əcnəbi ölkələr üçün kreativlik olmaz, amma yuxarıda dediyim səbəbə görə bizdə yüz faiz işə yarayacaq.

Çox qısa olsa da  kreativ vizitka dizaynına nəzər saldıq. Aşağıda əcnəbi millətlərin dizaynerlərinin əl işlərindən ibarət kiçik kolleksiya yerləşdirdim. Baxıb nəticə çıxaraq ;).

Gələcək Dizayn dərslərində görüşənədək, hələlik...