Tədricən proqramlarımızla tanış olmağın vaxtı çatdı. İlk olaraq qrafik proqramların içərisində, obrazlı desək, ən hörmət etdiyim olanından – Adobe Photoshop-dan başlayaq.

İlk olaraq onu qeyd edim ki, proqramın azəricə düzgün deyiliş qaydası "adob fotoşop"-dur. Proqramın adının qəribə şəkildə ifadəsini çox eşitdiyim üçün mövzuya ilk olaraq bu düzəlişlə başladım )).

Boş səhifəli proqramın quruluşu bir neçə hissədən ibarətdir:
1. Menyu 2. Nəzarət paneli 3. Alətlər paneli 4. Sənəd 5. Pəncərələr 

Ümumi anlayış olsun deyə bir az bu hissələrin nəyə xidmət etdiyini izah etməyə çalışaq.

Menyu.
Əksər proqrama xas olan vacib bir elementdir. Menyu vasitəsilə fayllarla iş görmək – yəni fayl yaratmaq, yaddaşda saxlamaq, yaddaşda olan faylı açmaq, proqramdan import və eksport əməliyyatlarını icra etmək; sənədin ölçü və rəng rejimlərini təyin etmək, rəng korreksiyası vermək, sənəddə olan qatlarla (layers) işləmək, müxtəlif filtrlərdən istifadə etmək və s. mümkündür. Amma bir qayda olaraq dizayn prosesində menyuya çox az müraciət olunur. Buna bir səbəb menyuda olan əksər funkisayaların proqramın digər hissələrində daha rahat formada mövcud olmasıdır. İkinci daha vacib səbəb isə əksər funkiyaları menyu vasitəsilə deyil, klaviaturanın müəyyən düymələrini basmaqla daha asan icra etməyin mümkünlüyüdür.

Yuxarıda dediklərimi bir misalla izah edim. Fotoşopun qatları ilə əməliyyatlar aparmaq üçün menyunun Layers bölümünə girmək, ordan isə istəndiyimiz əməliyyatı seçməyimiz tələb olunur. Ama buna çox vaxt ehtiyac qalmır. Əvvəla ona görə ki, qatlarla işləmək üçün Layers adlı ayrıca bir pəncərə mövcuddur. Bu pəncərədən qatlarla bağlı əksər əmrləri icra etmək mümkündür. Digər tərəfdən meyunu açarkən bəzi əmrlərin qarşısında klaviaturanın bəzi düymələrinin plyus (+) işarəsi vasitəsilə birləşmələrini görə bilərsiniz. Məsələn yeni qat yaratmaq üçün menyudan layers - new layers bölümünə girmək lazımdır. Həmin əmrin qarşısında shift+ctrl+N kimi klaviatura düymələrinin birləşməsini görə bilərsiniz. Bu düymələri sıxmaqla daha asan və tez formada yeni qat yarada bilərsiniz.

Qatların (layers) nə olduğunu hələ fikirləşməyin bunu sadəcə izah etmək üçün seçdim.

Nəzarət paneli.
Bəzi alətləri və ya funksiyaları istifadə edərkən bu panel vasitəsilə həmin funksiyaların bəzi parametrlərini tənzimləmək olar. Məsələn yazı alətini (type tool) aktivləşdirib sənədə mətn daxil edərkən Nəzarət Panelində yazıya aid olan bəzi xüsusiyyətlər aktivləşir. Bu zaman siz paneldən şrifti, onun ölçüsünü, stilini, rəngini və s. tənzimləyə bilərsiniz.

Sənəd.
Fotoşopda boş sənəd yaradarkən və ya yaddaşda olan hər hansı bir şəkli açarkən sənəd pəncərəsi aktivləşmiş olur. Bu hissə haqqında uzun danışmadan keçək növbəti hissəyə, çünki Adobe Photoshop-da sənədin yaradılması və onunla sadə əməliyyatlar haqqında növbəti dərsdə məlumat verəcəm.

Pəncərələr.
Adobe Photoshop-un nə qədər funksional və çoxşaxəli olduğunu görmək istəyən onun pəncərələrinə, oradakı funksiyalara sadəcə göz gəzdirməsi kifayət edər. Qatlarla primitiv əməliyyatlardan başlamış rəng korrkesiyasına kimi, fayl (şəkil, foto) haqqında müxtəlif informasiyalar, mətn, fırça, animasiya üçün çoxsaylı xüsusiyyətləri özündə əks etdirən pəncərələr bu proqramda işləməyi çox maraqlı bir prosesə çevirir. Bu pəncərələr və oradakı funksiyalar haqqında yeri gəldikcə çox söhbət açılacaq.

Proqram haqqında ümumi informasiya hələlik bu qədər. Növbəti dərslərdə görüşənə qədər, Allaha əmanət...